kis tarah chhoḌ duun ai yaar main chahat teri
mere iman ka hasil hai mohabbat teri
jaane kya baat hai jalvon men tire jan-e-jahan
yaad aata hai ḳhuda dekh ke surat teri
ab nigahon men jachega na koi rang-o-jamal
meri ankhon ko pasand aa ga.i rangat teri
apni qismat pe farishton ki tarah naaz karun
mujh pe ho jaa.e agar chashm-e-inayat teri
haram-o-dair ke jalvon se mujhe kya matlab
shisha-e-dil men utar aa.i hai surat teri
astane se tire sar na uThega mera
mudda.a ban ke mili hai mujhe nisbat teri
main ‘fana’ ho ke pahunch ja.unga tere dar tak
raah dikhlane lagi mujh ko mohabbat teri
Leave a Reply