ik teri be-ruḳhi se zamana ḳhafa hua
ai sang-dil tujhe bhi ḳhabar hai ki kya hua
daryuza-gar samajh ke to thi multafit hayat
vo yuun kaho ki daman-e-dil hi na va hua
Duuba kuchh is tarah se mira aftab-e-dil
sab kuchh hua ye phir na sahar-ashna hua
yuun us ke dar pe baiThe hain jaise yahin ke hon
haa.e ye dard-e-ishq jo zanjir-e-pa hua
chhini hai ishq ne tab-o-tab-e-dimagh-o-dil
main kaise shah-zor se zor-azma hua
ghar se chalo to bandh ke sar se kafan chalo
shahr-e-vafa se dasht-e-fana hai mila hua
dil de ke ḳhush huun main ki hifazat ka gham gaya
tujh se qarib hai vo jo mujh se juda hua
lab se laga to bhuul ga.e ham gham-e-hayat
saghar men koi tujh sa hasin hai chhupa hua
pi ham ne ḳhuub ‘arsh’ kashid-e-nigah-o-dil
kis mai-kade ka dar tha jo ham par na va hua
Leave a Reply