Ahd-E-Wafa Subuk-Hawa Rang-E-Wafa Ke Sath Sath

Sajjad Baqar Rizvi

ahd-e-vafa subuk-hava rang-e-vafa ke saath saath

ruh-e-suḳhan badal ga.i tarz-e-ada ke saath saath

sar men liye tiri hava azim-e-shahr-e-dil chala

nik.hat-e-gul ke ham-rikab mauj-e-saba ke saath saath

Dhang badalte ja.enge rang machalte a.enge

laghzish-e-pa ki tarz men rang-e-hina ke saath saath

ek tire ḳhayal ne fikr ko par laga diye

ham bhi havaon men rahe mauj-e-hava ke saath saath

ta ye safar hayat ka maqsad-e-zindagi bane

chahiye markaz-e-nigah gardish-e-pa ke saath saath

lazzat-e-na-umidi-e-shauq bhi mustaqil to ho

tark-e-talab bhi kijiye tark-e-dua ke saath saath

aap hi kah ke sunte hain aap hi sun ke hanste hain

apni hi bazgasht hain apni sada ke saath saath

haq bhi hai maslahat-e-talab ruḳh pe hava-e-dahr ke

chalte hain ab ḳhuda-parast ḳhalq-e-ḳhuda ke saath saath

‘baqar’-e-kam-ayar ki qadr kahan thi ziist men

uTh ke ḳhamosh chal diya vo bhi qaza ke saath saath