ḳharab-o-ḳhasta hue ḳhaak men shabab mila
hamen ye dil na mila jaan ka azaab mila
kisi ki yaad men be-shubah be-qarar hai tu
ki aaj hai tiri shoḳhi men iztirab mila
sharab pi to gunahgar main hua vaa.iz
bura.i ki jo miri tujh ko kya savab mila
mile vo aish-e-guzishta bhi ai ḳhuda mujh ko
bahisht men jo dobara mujhe shabab mila
baḌi karim hai pir-e-mughan ki bhi sarkar
ki jab mila mujhe saghar alal-hisab mila
kuchh aarzu na rahi tark-e-arzu ke siva
mire saval ka aisa mujhe javab mila
gaya jo dil to mila dagh-e-arzu mujh ko
ik aftab jo khoya ik aftab mila
‘hafiz’ tum ko vo nakam-e-vasl kahte hain
bura na maano ye achchha tumhen ḳhitab mila
Leave a Reply