dikha rahi hai jahan dhuup ab asar apna
bikherta tha vahin saaya ik shajar apna
phalon ka ab ke bhi pahle se ho gaya sauda
daraḳht chhu na sakenge koi samar apna
bahut hi tez tha ḳhanjar hava ke hathon men
bacha saka koi taa.ir na bal-o-par apna
kabhi jo samne aaya to chhup gaya huun kabhi
ye ek khel raha ḳhud se umr-bhar apna
abhi to baaqi hain manzil ki Thokaren kuchh aur
yahin pe ḳhatm nahin hai abhi safar apna
ye kaun sham.a liye pesh pesh chalta raha
dikha.i bhi na diya kaun tha ḳhizar apna
nizam-e-jabr ki vo kar raha hai phir tausi.a
baḌha raha hai vo phir halqa-e-asar apna
koi nahin hai jo shamshir chhin le us se
chhupa.e phirta hai har ek shaḳhs sar apna
kisi pe khulta bhi kya apna karb-e-gham ‘mohsin’
na koi marsiyan-ḳhvan tha na nauhagar apna
Leave a Reply