Wali Aasi
chhatri laga ke ghar se nikalne lage hain ham
ab kitni ehtiyat se chalne lage hain ham
is darja hoshiyar to pahle kabhi na the
ab kyuun qadam qadam pe sambhalne lage hain ham
ho jaate hain udaas ki jab dopahar ke ba.ad
suraj pukarta hai ki Dhalne lage hain ham
aisa nahin ki barf ki manind hon magar
lagta hai yuun ki jaise pighalne lage hain ham
a.ina dekhne ki zarurat na thi koi
ḳhud jante the ham ki badalne lage hain ham
is ka yaqin aaj bhala kis ko aa.ega
ik dhimi dhimi aanch men jalne lage hain ham
sach puchhiye to is ki hamen ḳhud ḳhabar nahin
mausam badal gaya ki badalne lage hain ham
Leave a Reply