jab use dekha zara nazdik se
tab samajh paa.e hain thoḌa Thiik se
baat jab hai dil ho ḳhud hi be-qarar
vo mohabbat kya mile jo bhiik se
bhuul baiThe qadr-dani ka chalan
log ham-rishta hain ab taz.hik se
raushni ka jashn sa hai har taraf
phir bhi chehre hain ka.i tarik se
ye jali lafzon men likha tha kahin
inqalab aata hai ik tahrik se
apna bhi andaz hai ‘mina’ alag
chal rahe hain haT ke thoḌa leak se
Leave a Reply