Ali Jawwad Zaidi
rah-e-ulfat men mile aise bhi divane mujhe
jo ma.al-e-dosti aa.e the samjhane mujhe
ishq ki halki si pahli aanch hi men jal bujhe
kya bhala dard-e-vafa denge ye parvane mujhe
ye to kahiye be-ḳhudi se mil ga.i kuchh agahi
varna dhoka de diya tha chashm-e-bina ne mujhe
na-muradi luuT hi leti mata-e-arzu
ik sahara de diya ehsas-e-farda ne mujhe
kis se kahta dil ki baten kis se sunta un ka raaz
bazm men to sab nazar aate hain begane mujhe
tauba tauba na-ummidi ki ḳhayal-ara.iyan
dekhte hon jaise ḳhud lalcha ke paimane mujhe
mera ik adna sa partav hai nizam-e-ka.enat
kya samajh rakkha hai is mahdud duniya ne mujhe
jab kabhi dekha hai ai ‘zaidi’ nigah-e-ghaur se
har haqiqat men mile hain chand afsane mujhe
Leave a Reply