hansi gulon men sitaron men raushni na mili
mile na tum to kahin bhi hamen ḳhushi na mili
na chand men na shafaq men na lala-o-gul men
jo aap men hai kahin bhi vo dilkashi na mili
nigah lutf ki hai muntazir miri shab-e-gham
sitare Duub chale aur raushni na mili
hamin ko saunp diye kul jahan ke ranj-o-alam
kisi men aur hamari si dil-dahi na mili
nigah-e-dost ne baḳhshi jo dil ko mad-hoshi
sharab-o-jam se ham ko vo be-ḳhudi na mili
har ik nashat men pinhan mila nashat ka gham
jo aish se ho basar aisi zindagi na mili
mire ḳhayal men hain ye tajalliyan kis ki
andheri raat men bhi mujh ko tirgi na mili
vahi faza vahi gulshan vahi hava hai magar
mili jo gul ko vo ḳharon ko zindagi na mili
gila karenge na ab mere ba.ad ke rahrav
ki un ko rah-e-mohabbat men raushni na mili
hazar baar hua ḳhun-e-arzu lekin
kabhi kisi ko miri aankh men nami na mili
jo chheḌti mire betab dil ke taron ko
kisi bhi saaz men darshan vo naghmagi na mili
Leave a Reply