Rakesh Dilbar
suraj ko ehsas dilaya ja sakta hai
jugnu se bhi kaam chalaya ja sakta hai
tum bas ik din un ka tabassum chakh kar dekho
un honTon se shahd banaya ja sakta hai
dost sabhi apne jo muḳhalif ho jaa.en to
dushman se bhi haath milaya ja sakta hai
us ka badan ḳhushbu ka tha to naam pe us ke
sandal ka ik peḌ lagaya ja sakta hai
dil kahta hai dekh ke un ka husn-e-mujassam
un pe ‘mir’ ka sher sunaya ja sakta hai
chahat men aisa hota rahta hai aksar
ruTha hai ‘dilbar’ to manaya ja sakta hai
Leave a Reply