Pandit Jagmohan Nath Raina Shauq
atish-e-ishq-e-bala aag laga.e na bane
aur ham us ko bujha.en to bujha.e na bane
rang-e-ruḳh uḌne pe aaj jaa.e to roke na ruke
laakh vo raaz chhupa.en to chhupa.e na bane
kya maza ho na rahe yaad jo andaz-e-jafa
main kahun bhi ki satao to sata.e na bane
ḳhud vafa hai miri shahid ki vafadar huun main
laakh tum dil se bhulao to bhula.e na bane
dil ke har zarra men hai soz-e-mohabbat ki numud
ḳhaak men in ko mila.un to mila.e na bane
rah-e-ulfat ne kuchh aisi miri surat badli
daman-e-dasht chhupa.e to chhupa.e na bane
dil ko ab tab-e-talafi o mudava abhi nahin
charagar aa.e to ehsan uTha.e na bane
koi ḳhaka miri tasvir ka khinche to sahi
khinch bhi jaa.e koi naqsha to miTa.e na bane
maut qaabu ki nahin aur na Thikana is ka
koi vaqt us pe bhi aa.e ki bana.e na bane
aise Dhab se ho gila un ki sitam ka ai ‘shauq’
baat kuchh chahen banani to bana.e na bane
Leave a Reply