Inam Sharar Ayyubi
kaun hoga miri jur.at ka badal mere ba.ad
ḳhatm ho ja.ega har radd-e-amal mere ba.ad
kaun phir meri tarah tera uḌa.ega mazaq
zindagi phir kise baḳhshegi ajal mere ba.ad
‘mir’ to ‘mir’ tha aur sach hi kaha tha us ne
sar-ba-gardan hi rahegi ye ghazal mere ba.ad
koi qadmon se nahin raundega daulat un ki
kis se uljhenge ye arbab-e-duval mere ba.ad
nazm-e-alam bhi mujhi se main bina-e-alam
dekhna aa.ega aalam men ḳhalal mere ba.ad
ibn-e-adam ki jibillat hai anasir ka fasad
ḳhatm hogi bhi to ye jang-o-jadal mere ba.ad
kaise suraj se nabard-azma hoga koi
kaun khelega ‘sharar’ aag se kal mere ba.ad
Leave a Reply