tu kare jo faisla aaj kar miri baat sun tu abhi na ja
mire dard-e-dil ka ilaaj kar miri baat sun tu abhi na ja
abhi jaane jaane ki zid na kar yahan ruTha ruTha hai saara ghar
kabhi ḳhush to mera mizaj kar miri baat sun tu abhi na ja
main mariz huun tire hijr ka zara haath men mira haath le
tu ghamon ka mere ilaaj kar miri baat sun tu abhi na ja
basi rang-o-nur men zindagi hai javan shab to faza hasin
mire jan-o-dil pe tu raaj kar miri baat sun tu abhi na ja
tu chhalakte ashkon ko dekh le zara sun le ye mira hal-e-dil
yuun na saḳht apna mizaj kar miri baat sun tu abhi na ja
kya hasin rahguzar hai ye baḌi lazzaton ka safar hai ye
na ḳhayal-e-taḳhta-o-taj kar miri baat sun tu abhi na ja
ye dua hai ‘arpit’-e-ḳhas ki zara dekh le zara soch le
tu zara zamane ki laaj kar miri baat sun tu abhi na ja
Leave a Reply