Duub kar gham ki nadi men muskurana chhoḌ den
aap ki ḳhatir ye divane zamana chhoḌ den
phir samundar par lagegi nasl-e-adam ki qatar
abr dharti par agar paani ko laana chhoḌ den
meri taqon men dhare meri gharibi ke charagh
silsila suraj se apna kya batana chhoḌ den
aap ki rangat badalne ka mujhe bas ḳhauf hai
dhuup se apne ta.alluq ko baḌhana chhoḌ den
maut ham ko dekh kar DhunDhegi ḳhud rah-e-farar
zindagi ke ham agar naḳhre uThana chhoḌ den
Leave a Reply