Dub Kar Gham Ki Nadi Mein Muskurana chhoD Den

Duub kar ġham kī nadī meñ muskurānā chhoḌ deñ

aap kī ḳhātir ye dīvāne zamāna chhoḌ deñ

phir samundar par lagegī nasl-e-ādam kī qatār

abr dhartī par agar paanī ko laanā chhoḌ deñ

merī tāqoñ meñ dhare merī ġharībī ke charāġh

silsila sūraj se apnā kyā batānā chhoḌ deñ

aap kī rangat badalne kā mujhe bas ḳhauf hai

dhuup se apne ta.alluq ko baḌhānā chhoḌ deñ

maut ham ko dekh kar DhūñDhegī ḳhud rāh-e-farār

zindagī ke ham agar naḳhre uThānā chhoḌ deñ

Leave a Comment