go tahi-daman huun lekin gham nahin
tere daman ka sahara kam nahin
aaj hi ye baat ai hamdam nahin
ek muddat se koi aalam nahin
juz tire dil men kisi ka gham nahin
tujh se itna rabta bhi kam nahin
jab qadam uTThe to rukte hain kahin
aaj manzil hi nahin ya ham nahin
aankh ham ashufta-halon se mila.e
gardish-e-dauran men itna dam nahin
donon aalam bhi muḳhalif hon to kya
mutma.in huun main ki tu barham nahin
dil men itni bas chuki hai un ki yaad
vo bhula bhi den to koi gham nahin
ham se puchho zabt-e-gham ki lazzaten
rone valon ko shu.ur-e-gham nahin
ham se vo tark-e-ta.alluq kar chuke
aur phir un ki mohabbat kam nahin
apne apne gham men hai har aadmi
aadmi ko aadmi ka gham nahin
ahrman apni jagah hai ahrman
fitrat-e-insan bhi lekin kam nahin
gham hai is duniya men jan-e-zindagi
zindagi men gham na ho to ham nahin
aah anjam-e-gham-e-dil ai ‘shamim’
ro raha huun aur ankhen nam nahin
Leave a Reply