Mujhe Hazar Martaba Pukar Kar Chala Gaya

mujhe hazār martaba pukār kar chalā gayā

vo saarī umr merā intizār kar chalā gayā

ujaḌ rahā thā Thiik se ujaḌne bhī nahīñ diyā

vo jaane vaalā kyoñ mujhe sañvār kar chalā gayā

ye kyā ḳhayāl aa gayā safar se qabl zehn meñ

jo har taraf ġhubār hī ġhubār kar chalā gayā

mirā phir āñsuoñ pe iḳhtiyār hī nahīñ rahā

mirī nigāh ko vo ābshār kar chalā gayā

mujhe nahīñ qubūl thī shikast mere yaar kī

jahāñ ko ye lagā kyā maiñ haar kar chalā gayā

vo jis ke ashk khīñch kar safar se laa.e the hameñ

hamāre āñsuoñ ko darkinār kar chalā gayā

Leave a Comment