jo huruf likh gaya tha miri aarzu ka bachpan
unhen dho sake na dil se miri zindagi ke savan
vo jo din bikhar chuke hain vo jo ḳhvab mar chuke hain
main unhi ka huun mujavir mira dil unhi ka madfan
yahi ek aarzu thi ki mujhe koi pukare
so pukarti hai ab tak mujhe apne dil ki dhaḌkan
koi TuTta sitara mujhe kaash phir sada de
ki ye koh-o-dasht-o-sahra hain sukut-e-shab se raushan
tiri manzil-e-vafa men hua ḳhud se ashna main
tiri yaad ka karam hai ki yahi hai dost dushman
tire ru-ba-ru huun lekin nahin ru-shanas tujh se
tujhe dekhne na degi tire dekhne ki uljhan
‘zafar’ aaj dil ka aalam hai ajab main kis se puchhun
vo saba kidhar se aa.i jo khila ga.i ye gulshan
Leave a Reply