Ba-Asani Kahin Shadan Dil-E-Nashad Hota Hai

Qaisar Haideri Dehlvi

ba-asani kahin shadan dil-e-nashad hota hai

baḌi barbadiyon kai ba.ad ye abad hota hai

Thahar ai gardish-e-dauran vo lab jumbish men aate hain

sarapa gosh ho kar sun ki kya irshad hota hai

dar-e-saqi se azad-e-do-alam uTh nahin sakta

quyud-e-maz.hab-o-millat se rind azad hota hai

guzishta hal-e-ulfat kya sunoge kya suna.unga

ye qissa kuchh kahin se kuchh kahin se yaad hota hai

payam-e-sad-musibat janta huun ik tabassum ko

laraz jaata huun jis din ḳhush dil-e-nashad hota hai

qafas ki titliyon uTho gale mil lo lipaT jaao

ki qaid-e-zindagi se ik asiir azad hota hai

kahan pahli si ‘qaisar’ rasm-e-shagirdi-o-ustadi

jo ik misra.a bhi kah leta hai ab ustad hota hai