kuchh na puchho ru-ba-ru ja kar kisi ke kya hua
TikTiki bandhne na paa.i thi ki dil chalta hua
le ga.i dil ko kisi ki ik nigah-e-avvalin
main kisi ke husn par yak-bargi shaida hua
us lab-e-shirin pe mera ek baar aaya jo naam
main ye samjha ḳhushtari pahlu-e-qismat va hua
hal-e-hijran puchhte kya ho ki surat dekh lo
saaf zahir hai mariz-e-gham gaya-guzra hua
huun sarapa majma-e-ummid-o-yas o intizar
dhire dhire chal raha hai yak-nafas rukta hua
raah kya sujhe mujhe duniya miri tarik hai
hai kisi zulf-e-siyah men dil mira uljha hua
aql ka tha pher apni jo unhen samjha tha ghair
vo to bilkul jan-e-jan hain raaz ye ifsha hua
tum miri taqdir men ho aur phir kya chahiye
kaun sa matlab raha phir jo nahin puura hua
mujh ko samjhaya nahin naseh udhar mat ja.iyo
phir kahoge ”luT ga.e ham, dil hamara kya hua”
ham to hain maddah us ke ham ko sab manzur hai
jo hua us ne kiya, jo kuchh hua achchha hua
un ko paane se gharaz thi kuchh na tha duniya se bair
mil ga.e vo ham ko duniya hi men aur achchha hua
ashiqi rahbar se sikho sar karo manzil ba-ḳhair
us ka hai ye rasta achchhi tarah dekha hua
Leave a Reply