Falak Ko Kis Ne Ek Parkar Par Rakkha Hua Hai

falak ko kis ne ik parkār par rakkhā huā hai

zamīñ ko bhī usī raftār par rakkhā huā hai

abhī ik ḳhvāb maiñ ne jāgte meñ aise hai dekhā

mirā aañsū tire ruḳhsār par rakkhā huā hai

shikast-o-fat.h kī ḳhātir hameñ laḌnā nahīñ hai

hamārā faisla sālār par rakkhā huā hai

palaT kar aa hī jā.egā kabhī bhūle se shāyad

so maiñ ne ik diyā dīvār par rakkhā huā hai

Leave a Comment