Agha Hashr Kashmiri
chori kahin khule na nasim-e-bahar ki
khush-bu uda ke laai hai gesu-e-yar ki
allah rakkhe us ka salamat ghurur-e-husn
ankhon ko jis ne di hai saza intizar ki
gulshan men dekh kar mire mast-e-shabab ko
sharmai jaari hai javani bahar ki
ai mere dil ke chain mire dil ki raushni
aa aur sub.h kar de shab-e-intizar ki
jurat to dekhiyega nasim-e-bahar ki
ye bhi balaen lene lagi zulf-e-yar ki
ai ‘hashr’ dekhna to ye hai chaudhvin ka chand
ya asman ke haath men tasvir yaar ki
Leave a Reply