Sabir Waseem
us jangal se jab guzroge to ek shivala aa.ega
vahan ruk jaana vahan rah jaana vahan sukh ka ujala aa.ega
ye soch ke uThna har din tum is dil ka phuul khilega zarur
is aas pe sona ab ki shab koi ḳhvab nirala aa.ega
jab us ke haath naya maazi is saf.ha-e-arz pe likkhenge
jab sahar o shaam raqam honge tab mera havala aa.ega
is be-andesha sahra men is unghne vaali ummat par
kab jagne vaala utrega kab sochne vaala aa.ega
phir ruhen zaḳhmi zaḳhmi hain phir koḌh se dukhne aa.e badan
yuun lagta hai ki shafa.at ko phir koi gvala aa.ega
ai rah-e-suḳhan ke rah-ravo dil-shad raho is raah men bhi
ḳhushbu ki savari Thahregi rangon ka piyala aa.ega
Leave a Reply