Chamak Yunhi Nahin Lafzon Mein Aai

chamak yūñhī nahīñ lafzoñ meñ aa.ī

kiyā hai ḳhūn-e-dil ko raushnā.ī

mire chehre se chipkī thī udāsī

hañsī māyūs ho kar lauT aa.ī

tamannāoñ ne kī sahrā-navardī

junūñ ne shahar meñ hī ḳhaak uḌaa.ī

maiñ dil kī baat sunñe kā huuñ aadī

mubārak tum ko patthar kī ḳhudā.ī

kitābeñ ishq kī gum ho ga.ī haiñ

adhūrī rah ga.ī merī paḌhā.ī

ujālā bhar gayā kamre meñ mere

tirī tasvīr kī hai rū-numā.ī

tamāzat merā māthā chūmtī hai

maiñ jab kartā huuñ sūraj kī burā.ī

nahīñ ḳhvāhish parinda shāḳh-e-dil par

to is ke TuuT jaane meñ bhalā.ī

ḳharīdegā ‘musavvir’ kaun tum ko

agar qīmat nahīñ apnī baḌhā.ī

Leave a Comment