Mil Chuka Mahfil Mein Ab Lutf-E-Shakebai Mujhe

mil chuka mahfil men ab lutf-e-shakeba.i mujhe

khinchti hai apni janib teri angḌa.i mujhe

ba.ad marne ke jo hasil hogi rusva.i mujhe

zindagi kya soch kar duniya men tu laa.i mujhe

ishq men yuun husn ki surat nazar aa.i mujhe

vo tamasha ban ga.e kah kar tamasha.i mujhe

ḳhud pukar uThta junun takmil-e-vahshat ho ga.i

vo samajh lete jo dil men apna sauda.i mujhe

ho gaya kohram barpa ḳhana-e-sayyad men

baiThe baiThe ashiyan ki yaad jab aa.i mujhe

kal tha main ka.abe men maujud aaj but-ḳhane men huun

chain deta hi nahin shauq jabin-sa.i mujhe

aa.ina bhi tha koi kya zindagi ka aa.ina

dekhne par maut ki surat nazar aa.i mujhe

zindagi ki kashmakash se dast-kash hona paḌa

naza.a men yaad aa ga.i jab un ki angḌa.i mujhe

khul ga.i chashm-e-basirat ḳhaak men milne ke ba.ad

dil ke har zarre men ik duniya nazar aa.i mujhe

hazrat-e-‘bismil’ ye achchhi dil ko sujhi dil-lagi

kar diya shamshir-e-qatil ka tamanna.i mujhe