Dam Na Nikla Yar Ki Na-Mehrbani Dekh Kar

dam na nikla yaar ki na-mehrbani dekh kar

saḳht hairan huun main apni saḳht-jani dekh kar

shaam se ta-sub.h-e-furqat sub.h se ta-sham-e-hijr

ham chale kya kya na lutf-e-zindagani dekh kar

yuun to lakhon gham-zada honge magar ai asman

jab tujhe janun ki la de mera saani dekh kar

ab tap-e-furqat se ye kuchh zof taari hai ki aah

dang rah jaati hai ham ko na-tavani dekh kar

vaste jis ke hue bahr-e-fana ke ashna

vo pasija bhi na apni jan-fishani dekh kar

baaz aa ‘bimar’ us ke ishq se jaane bhi de

taras aata hai ye teri naujavani dekh kar

Leave a Comment