Poet
ye lau kaisi hai jo ik saans bhi maddham nahin hoti
bhulane par bhi zalim yaad us ki kam nahin hoti
ye matlab-ashna duniya ye zalim bevafa duniya
sharik-e-aish kar liije sharik-e-gham nahin hoti
adam ke jaane vaale qafile din-rat chalte hain
magar is anjuman ki dilkashi kuchh kam nahin hoti
na puchh ai ham-nashin rudad-ha-e-sham-e-gham ham se
qayamat ki sahar hoti hai sham-e-gham nahin hoti
bhulaya hai mujhe tu ne tiri barham-mizaji ne
magar bedard teri yaad phir bhi kam nahin hoti
nahin vaqif tu ai dil atish-e-soz-e-mohabbat se
ye daulat jis qadar aati hai ghar men kam nahin hoti
‘safir’ ab tak to rudad-e-mohabbat ḳhaam hai teri
abhi to aankh bhi fart-e-alam se nam nahin hoti
Leave a Reply