Nihal Sevharvi
yahi be-laus mohabbat yahi gham-ḳhvari-e-ḳhalq
aur meraj kise kahte hain insanon ki
naam hai kya isi hangame ka aghaz-e-shabab
ek andhi si chali aati hai armanon ki
jis qadar ishq se hoti hai fuzun vus.at-e-fikr
aql rakhti hai bina.en na.e zindanon ki
apni maut apni tabahi ki taraf kya dekhen
ki nigahen taraf-e-sham.a hain parvanon ki
ho ga.i umr baharon ke tasavvur men tamam
sair karte rahe na-did gulistanon ki
ma-siva is ke nahin aur kuchh afsana-e-hind
ek tariḳh hai ujḌe hue kashanon ki
Leave a Reply