Naeem Gilani
nasheb-e-hijr men din iḳhtitam karte hue
main ḳhud men Dubta jaata tha shaam karte hue
har ek lahr hai apne isi bahao men
main thak gaya tire dariya ko raam karte hue
baras paḌa jo kisi roz mujh pe aks mira
darun-e-a.ina-ḳhana qayam karte hue
mire sukut ko dohrane vaale ye dar-o-bam
suna.i dene lage hain kalam karte hue
tamam-umr tiri rahguzar pe baiTh raha
mira ghubar tira ehtiram karte hue
ye ḳhamushi hai to rukiye baghaur sunte hue
suḳhanvari hai to chaliye tamam karte hue
gurez-pa.i ki had se guzar gaya tha vo shaḳhs
‘na.im’ duur se mujh ko salam karte hue
Leave a Reply