Poet
mubtala ḳhud ko kisi gham men musalsal rakhna
aur us gham ko tiri aankh se ojhal rakhna
chand khiḌki men kabhi dhuup men badal rakhna
dhyan rakhna jo kisi ka to har ik pal rakhna
chalna sikha hi nahin raah se haT kar ham ne
ik qadam us ki taraf ik su-e-maqtal rakhna
dekhna maand na paḌ jaa.en gham-e-hijr men ye
tum shab-e-vasl ka in ankhon men kajal rakhna
ik zara baat se is jaan pe ban aati thi
raas aaya bhi to gham se ise bojhal rakhna
jis ko kahna tha usi ko nahin kahna aur phir
kaise andeshon men ḳhud ko yunhi pagal rakhna
aisa lagna ki ye ankhen to barasti hi nahin
sail-e-gham se magar andar koi jal-thal rakhna
ham to is arsa-e-hasti men jhulaste hi rahe
na hua dhuup men ik ḳhvab ka badal rakhna
Leave a Reply