Qaisarul Jafri
ahd-e-junun men baiThe baiThe jo ghazlen likh Daali thiin
ham ko rusva duniya bhar ko pagal karne vaali thiin
ankhon men vo shaam ka TukḌa aksar chubhta rahta hai
ghar men andhi jab aa.i thi sham.en jalne vaali thiin
chand sitare TuuT rahe the ḳhvabon ki angna.i men
aankh khuli to dekha ghar ki sab divaren kaali thiin
chuTki bhar ummid nahin thi kaasa le kar kya phirte
shahr-e-vafa ki saari galiyan apni dekhi-bhali thiin
pyaar ka mausam biit chuka tha basti men jab pahunche ham
logon ne phulon ke badle talvaren mangva li thiin
‘qaisar’ dil ka haal suna kar jab yaron ka munh dekha
sab ke chehre sukhe sukhe sab ki ankhen ḳhali thiin
Leave a Reply