Kabhi Hans Raha Tha Kabhi Ga Raha Tha

kabhī hañs rahā thā kabhī gā rahā thā

mirā hausla thā jiye jā rahā thā

ye achchhā huā koī milne na aayā

maiñ ḳhud apne saa.e se katrā rahā thā

vo pahlī kiran sī mire āñsuoñ kī

mujhe apnā ik ḳhvāb yaad aa rahā thā

ka.ī aql kī gutthiyāñ thiiñ mirā dil

samajhtā na thā mujh ko samjhā rahā thā

usī par na.e phuul bhī khil rahe the

vahī shāḳh maiñ jis pe murjhā rahā thā

vo mujh se milā shaam ke vaqt jab maiñ

parindoñ ke hamrāh ghar jā rahā thā

Leave a Comment