Farhat Ehsas
ḳhaak hai mera badan ḳhaak hi us ka hoga
donon mil jaa.en to kya zor ka sahra hoga
phir mira jism miri jaan se juda hai dekho
tum ne Tanka jo lagaya tha vo kachcha hoga
tum ko rone se bahut saaf hui hain ankhen
jo bhi ab samne aa.ega vo achchha hoga
roz ye soch ke sota huun ki is raat ke ba.ad
ab agar aankh khulegi to savera hoga
kya badan hai ki Thaharta hi nahin ankhon men
bas yahi dekhta rahta huun ki ab kya hoga
Leave a Reply