is bulandi pe kahan the pahle
ab jo badal hain dhuan the pahle
naqsh miTte hain to aata hai ḳhayal
ret par ham bhi kahan the pahle
ab har ik shaḳhs hai ezaaz talab
shahr men chand makan the pahle
aaj shahron men hain jitne ḳhatre
jangalon men bhi kahan the pahle
log yuun kahte hain apne qisse
jaise vo shah-jahan the pahle
TuuT kar ham bhi mila karte the
bevafa tum bhi kahan the pahle
Leave a Reply