phirte rahe azal se abad tak udaas ham
aa.e na inqilab-e-zamana ko raas ham
dekhenge chhu ke surḳh badan aftab ka
tabdil kar chuke hain ḳhala ka libas ham
ye zindagi to ḳhun-e-jigar pi ga.i tamam
kaise bujha.en sukhe samundar ki pyaas ham
shahr-e-junun ki dhuup jala degi jism-o-jan
chaliye chalen ghanere chanaron ke paas ham
pur-nur hai hamin se ḳharaba hayat ka
raton ka rang tum ho ujalon ki aas ham
amrit sharab zahr aji kuchh to Daliye
aa.e hain le ke duur se ḳhali gilass ham
jab se bichhaḌ ga.i tiri ḳhana-ba-dosh yaad
ai ‘prem’ suune ghar ki tarah hain udaas ham
Leave a Reply