Ramesh Kanwal
tujh se main mujh se ashna tum ho
main huun ḳhushbu magar hava tum ho
main likhavaT tumhare hathon ki
meri taqdir ka likha tum ho
tum agar sach ho, main bhi jhuuT nahin
aks main, mera aa.ina tum ho
be-ḳhudi ne mira bharam toḌa
main samajhta raha ḳhuda tum ho
main huun mujrim, mire ho munsif tum
main ḳhata huun, miri saza tum ho
siip ki aas ban ke chahun tumhen
laa.e jo moti vo ghaTa tum ho
apni majburiyon ka ranj nahin
bevafa main huun, ba-vafa tum ho
rog ban kar paḌa hua hai ‘kanval’
tum dava ho, miri dua tum ho
Leave a Reply