Ta-Ba-Kai Manzil-Ba-Manzil Hum Musafir Bhagte

Rauf Khair

ta-ba-kai manzil-ba-manzil ham musafir bhagte

aankh ab Thahri hui hai aur manazir bhagte

ai harif-e-har-qadam shah-mat se bachne ki soch

is bisat-e-ḳhak se kya ham se shatir bhagte

ham to aa.e hain yahan miTne miTane ke liye

is zamin-e-karbala se kis ki ḳhatir bhagte

bas men aa jaane ka jazba bas men karne ki havas

ḳhak-o-bad-o-ab-o-atish bhi hain qasir bhagte

sar kahin paanv kahin ankhen kahin chehra kahin

is havas men kho ga.i pahchan aḳhir bhagte

‘ḳhair’ shab-ḳhun maar kar chhup jaane vaale ham nahin

ma.arka sar karne nikle hain to kya phir bhagte

khod lete hain kuaan shahdab pa lete hain ‘ḳhair’

is zamin-e-saḳht se kya ham se sha.ir bhagte