Abdul Ahad Saaz
jaane qalam ki aankh men kis ka zuhur tha
kal raat mere giit ke mukhde pe nuur tha
naghma sa chhedti thiin tajalli ki ungliyan
tauret ka nuzul ba-lahn-e-zabur tha
vo saath saath aur pahunchna tha us talak
har aan ek marhala nazdik o duur tha
haibat ke baam par thi bulave ki raushni
thi vasvason ki shaam pa jaana zarur tha
har pech koi vaqia har mod koi yaad
us ke badan ke saath mira la-shuur tha
ik bhiid mujh se muntazir-e-inkishaf thi
main tha muraqabe men magar be-huzur tha
Leave a Reply