Razi Akhtar Shauq
do badal aapas men mile the phir aisi barsat hui
jism ne jism se sargoshi ki ruuh ki ruuh se baat hui
do dil the aur ek sa mausam jis ki saḳhavat aisi thi
main bhi ik barkha men nahaya vo bhi abr-sifat hui
us ke haath men haath liye aur dhuup chhanv men chalta hua
yuun lagta tha saari duniya jaise mere saath hui
saari umr suragh na milta apne hone na hone ka
ye ik lahr lahu ki janan donon ka isbat hui
is mausam ne jaate jaate ik do pal ki barish ki
phir vahi halqa paanv men aaya phir vahi gardish saath hui
Leave a Reply