‘ḳhizan’ men ḳhubiyan aaise bahut hain
ḳharabi ek hai bante bahut hain
koi rasta kahin jaa.e to janen
badalne ke liye raste bahut hain
na.i duniya ke sundar ban ke andar
purane vaqt ke paude bahut hain
hue jab se zamane bhar ke ham-rah
ham apne saath bhi thoḌe bahut hain
lagavaT hai sitaron se purani
raqabat hai magar milte bahut hain
bahut hoga to ye sochoge shayad
ki ham bhi the yahan jaise bahut hain
hai sab surat ka chakkar, ḳhvab ma.ani
dikha.e hain bahut dekhe bahut hain
jasarat dil men kya ho fan men kya ho
mulazim-pesha hain Darte bahut hain
kisi se kyuun ulajhte kya ulajhte
ye dhage ḳhud-ba-ḳhud uljhe bahut hain
thakan charon taraf hai chalte jaao
pahunchta kaun hai chalte bahut hain
ḳhafa ham se na ho ai chashm-e-janan
ham is andaz par marte bahut hain
kaho ye bhi ‘ḳhizan’ kahne se pahle
jo kahte kuchh nahin kahte bahut hain
Leave a Reply