Natiq Lakhnavi
partav-e-nur bhi hai jauhar-e-tanvir bhi hai
aa.ina bhi hai mira dil tiri tasvir bhi hai
zahr hai sab ke liye zahar-e-mohabbat lekin
agar aa jaa.e muafiq to phir iksir bhi hai
mujrim-e-ishq huun qatil ka main ai davar-e-hashr
saaf to ye hai ki is men miri taqsir bhi hai
kis qadar sarfa nigahon ka hua ghairon men
kahiye ab aap ke tarkash men koi tiir bhi hai
kyuun kiya karta hai to sam.a-ḳharashi ‘natiq’
sher kahta hai to kuchh sher men tasir bhi hai
Leave a Reply