na gul na sarv miyan-e-bahar hota hai
hamari khaak se paida chinar hota hai
kabhi jo jalva-e-rukhsar-e-yar hota hai
charagh-e-tur charagh-e-mazar hota hai
utha janaza jo mera qaza lagi kahne
ki jo piyada hai akhir savar hota hai
mila ke khaak men tan ko gai bahisht men ruuh
kisi ka kaun zamane men yaar hota hai
baja hai takht-e-sulaiman pe bhi jo maari laat
har ek murgh yahan tajdar hota hai
na apne ghar men mujhe ghair se mila ai huur
bahisht men ye azab-e-fishar hota hai
uruuj ‘arsh’ jo manzur hai jala dil ko
ki aag lagti hai jab sard anaar hota hai
Leave a Reply