aftab-iqbal-shamim

Dikhai Jaegi Shahr-e-Shab Mein Sahar Ki Tamsil Chal Ke Dekhen

dikhai jaegi shahr-e-shab men sahar ki tamsil chal ke dekhen

sar-e-salib istada hoga khuda-e-injil chal ke dekhen

gulon ne band-e-qaba hai khola, hava se bu-e-junun bhi aae

karenge is mausam-e-vafa men ham apni takmil chal ke dekhen

ghanim-e-shab ke khilaf ab ke ziyan hui ghaib ki gavahi

pada hua khaak par shikasta par-e-ababil chal ke dekhen

chune hain vo reza reza manzar, lahu lahu ho gai hain ankhen

chalo naa! us dukh ke raste par safar ki tafsil chal ke dekhen

faza men udta hua kahin se ajab nahin aks-e-barg aae

khizan ke be-rang asman se ati hui jhiil chal ke dekhen

ludhak gaya shab ka koh-paima zamin ki hamvariyon ki janib

kahin hava gul na kar chuki ho ana ki qindil chal ke dekhen

More Poems

Leave a Comment