vo raat be-panah thi aur main gharib tha
vo jis ne ye charagh jalaya ajiib tha
vo raushni ki aankh uthai nahin gai
kal mujh se mera chand bahut hi qarib tha
dekha mujhe to taba ravan ho gai miri
vo muskura diya to main shaer adiib tha
rakhta na kyuun main ruuh o badan us ke samne
vo yuun bhi tha tabib vo yuun bhi tabib tha
har silsila tha us ka khuda se mila hua
chup ho ki lab-kusha ho bala ka khatib tha
mauj-e-nashat o sail-e-gham-e-jan the ek saath
gulshan men naghma-sanj ajab andalib tha
main bhi raha huun khalvat-e-janan men ek shaam
ye khvab hai ya vaqai main khush-nasib tha
harf-e-dua o dast-e-sakhavat ke baab men
khud mera tajraba hai vo be-had najib tha
dekha hai us ko khalvat o jalvat men bar-ha
vo aadmi bahut hi ajib-o-gharib tha
likkho tamam umar magar phir bhi tum ‘alim’
us ko dikha na paao vo aisa habib tha