na puchh kyuun miri ankhon men aa ga.e aansu
jo tere dil men hai us baat par nahin aa.e
vafa-e-ahd hai ye pa-shikastagi to nahin
Thahar gaya ki mire ham-safar nahin aa.e
na chheḌ un ko ḳhuda ke liye ki ahl-e-vafa
bhaTak ga.e hain to phir raah par nahin aa.e
abhi abhi vo ga.e hain magar ye aalam hai
bahut dinon se vo jaise nazar nahin aa.e
kahin ye tark-e-mohabbat ki ibtida to nahin
vo mujh ko yaad kabhi is qadar nahin aa.e
ajiib manzil-e-dilkash adam ki manzil hai
musafiran-e-adam lauT kar nahin aa.e
hafiz kab unhen dekha nahin ba-rang-e-digar
‘hafiz’ kab vo ba-rang-e-digar nahin aa.e
Leave a Reply