jhuk ga.i jab ye ana tere dar-e-saffak par
mujh se mat puchho ki kya guzri dil-e-be-bak par
is zamin se asman tak main bikharti hi ga.i
ab na simTi to girungi ek din main chaak par
main rahi ik hijr men aur ek ab milne ko hai
jaan se main yuun ga.i to ḳhaak Daalo ḳhaak par
ab vahan phuTenge phir se lala-o-gul dekhna
ho raha hai ḳhuun ka chhiḌkav arz-e-pak par
ye tiri yadon ke jugnu ya ki aansu hain mire
jo sitare se chamakte hain miri poshak par
kyuun dayar-e-ghair men murjha ga.e chehron ke phuul
barf si girti rahi is dida-e-nam-nak par
jis tarah guzri hai meri zindagani kya kahun
tu vahan baiTha hai phir kis ke liye aflak par
Leave a Reply