Jhuk Gai Jab Ye Ana Tere Dar-E-Saffak Par

jhuk ga.ī jab ye anā tere dar-e-saffāk par

mujh se mat pūchho ki kyā guzrī dil-e-be-bāk par

is zamīñ se āsmāñ tak maiñ bikhartī hī ga.ī

ab na simTī to girūñgī ek din maiñ chaak par

maiñ rahī ik hijr meñ aur ek ab milne ko hai

jaan se maiñ yuuñ ga.ī to ḳhaak Daalo ḳhaak par

ab vahāñ phūTeñge phir se lāla-o-gul dekhnā

ho rahā hai ḳhuun kā chhiḌkāv arz-e-pāk par

ye tirī yādoñ ke jugnū yā ki aañsū haiñ mire

jo sitāre se chamakte haiñ mirī poshāk par

kyuuñ dayār-e-ġhair meñ murjhā ga.e chehroñ ke phuul

barf sī girtī rahī is dīda-e-nam-nāk par

jis tarah guzrī hai merī zindagānī kyā kahūñ

tū vahāñ baiThā hai phir kis ke liye aflāk par

Leave a Comment