shurua ahl-e-mohabbat ke imtihan hue
ab un ko naaz hua hai ki ham javan hue
sabhon ki aa ga.i piiri jo tum javan hue
zamin ka dil hua miTTi ḳham asman hue
ghazab se kam nahin hota vafur-e-rahmat bhi
main Dar gaya vo ziyada jo mehrban hue
are zara mire dil se ye koi puchh aa.e
usi tarah vo ḳhafa hain ki mehrban hue
khila naya koi gul duur duur pahunchi bu
na kyuun jahan men ho shohrat ki vo javan hue
dil-o-jigar ki jagah daagh tak nahin baaqi
jo nam-dar paḌe the vo be-nishan hue
dil-o-jigar men nahin jan-e-tan ka zikr hai kya
hamare marne se ḳhali ka.i makan hue
guzishtagan ke jo qisse bayan karte the
ab un ke zikr bhi kanon ko dastan hue
evaz namaz-e-janaza ke mere lashe par
tamam qissa-e-mehr-o-vafa bayan hue
gaya dil us ka vo aa baiThe jis ke pahlu men
bas us ki jaan ga.i jis pe mehrban hue
vo qatl karte magar rahm aa gaya hai ‘rashid’
ye mere naale mire vaste amaan hue
Leave a Reply