ab miri yaad ko daman ki hava.en dena
main gaya vaqt huun mujh ko na sada.en dena
saḳht be-jalva-o-be-nur hain lamhat-e-firaq
dil bahal ja.ega chehre ki ziya.en dena
hijr ki pyaas se jalte hain bagulon ke dahan
ḳhushk sahraon ko zulfon ki ghaTa.en dena
yaad aate hain javani ke junun-ḳhez ayyam
muztarib ho ke bayaban ko sada.en dena
phir qadam ku-e-malamat ki taraf uTThe hain
mire maula mire hisse ki ḳhata.en dena
jama-zebi pe tiri varna lagega ilzam
ishq ke paikar-e-uryan ko rava.en dena
us ka mujh par baḌa ehsan-e-masiha.i hai
mere yaaro mire qatil ko dua.en dena
Leave a Reply