Zahiran Ye but to Hain Nazuk Gul-E-Tar Ki Tarah

Shauq Bahraichi

zahiran ye but to hain nazuk gul-e-tar ki tarah

dil magar hota hai kam-baḳhton ka patthar ki tarah

jalva-gah-e-naz men dekh aa.e hain sau baar ham

rang-e-ru-e-yar hai bilkul chuqandar ki tarah

munis-e-tanha.i jab hota nahin hai ham-ḳhayal

ghar men bhi jhanjhaT hua karta hai bahar ki tarah

aap behad nek-tinat nek-sirat nek-ḳhu

harkaten karte hain lekin aap bandar ki tarah

jis ke haami ho ga.e vaa.iz vo baazi le gaya

ahmiyat hai aap ki duniya men joker ki tarah

allah allah ye sitam-gar ki qayamat-ḳhez chaal

roz hangama hua karta hai mahshar ki tarah

puchhne vaale gham-e-janan ki shirini na puchh

gham ke maare roz uḌate hain muza.afar ki tarah

zeb-e-tan vaa.iz ke dekhi hai qaba-e-zar-nigar

sar pe amama hai ik dhobi ke gaTThar ki tarah

dost ke ifa-e-va.ada ka hai ab tak intizar

guzra october november bhi september ki tarah

naaz men andaz men raftar men guftar men

ardali bhi hain collector ke collector ki tarah

nashsha-bandi chahte to hain ye haami diin ke

phir bhi mil jaa.e to pi len shir-e-madar ki tarah

ho raha hai jis qadar bhi ‘shauq’-sahab insidad

utni hi kaTti hai rishvat muuli gajar ki tarah