Poet
jo bhi nikle tiri avaz lagata nikle
aise halat men ab ghar se koi kya nikle
us ke lahje men sarabon ki ajab raunaq hai
ain mumkin hai vo tapta hua sahra nikle
har taraf ḳhvab vahi ḳhvab vahi ik chehra
ab kisi taur mere ghar se ye malba nikle
dasht valon ko batao ki yahan main bhi huun
kya pata mujh se hi un ka koi rasta nikle
bas isi aas men baiTha huun sar-e-sahra main
koi badal mujhe avaz lagata nikle
kaash aisa ho tere shahr men pyasa aa.uun
aur tire qadmon se ho kar koi dariya nikle
raqs karte the tire hathon pe kitne aalam
ab to ankhon se miri rang hina ka nikle
tere hone pe bhi ik Dar sa laga rahta hai
kaise is ji se tire hijr ka dhaḌka nikle
Leave a Reply