Kis Ne Ye Socha Tha Haidar Aisa Bhi Ho Sakta Hai

Poet

kis ne ye socha tha ‘haidar’ aisa bhi ho sakta hai

jis ko pyaar samajh baiThe vo dhoka bhi ho sakta hai

ghairon ke hathon men ḳhanjar DhunD rahe ho aḳhir kyon

jis ne kiya barbad hamen vo apna bhi ho sakta hai

sansen lena bas ho alamat jiine ki lazim to nahin

dil ke andar jhank ke dekho murda bhi ho sakta hai

saare jahan men baat mohabbat ki jo karta phirta hai

us ke ghar nafrat ka andhera phaila bhi ho sakta hai

teri mahfil tere bande ho jitna bhi shor magar

ham mahfil men aa.en to sannaTa bhi ho sakta hai

phir se kisi ko dil men basa.un phir se kisi ke dard sahun

ye dil ka angan hai suuna suuna bhi ho sakta hai

aag lagane se pahle ai kaash vo itna soch bhi le

ye jo jala hai ye mera sarmaya bhi ho sakta hai

‘haidar’ saara haal main apna kaise ghazal men likh Dalun

fikr mujhe bas ye hai koi rusva bhi ho sakta hai